“Ятгах тусам нягтал-2021” аяны хүрээнд хэлэлцүүлэг боллоо

Монголбанк, Цагдаагийн Ерөнхий газар, Монголын банкны холбоо хамтран залилах болон цахим гэмт хэргээс урьдчилан сэргийлэх “Ятгах тусам нягтал-2021” аяныг 2021 оны 7 дугаар сарын 19-ний өдрөөс 10-р сарын 31-ний өдрийг дуустал зохион байгуулж байгаа билээ. Тус аяны хүрээнд “Цахим орчин дахь залилах гэмт хэрэг” сэдэвт хэлэлцүүлэг өнөөдөр боллоо.

Хэлэлцүүлэгт Монголбанкны Дэд ерөнхийлөгч Г.Энхтайван, Цагдаагийн ерөнхий газрын Тэргүүн дэд дарга, Цагдаагийн хурандаа Ц.Ням-Очир, Монголын банкны холбооны Дэд ерөнхийлөгч Р.Мөнхтуяа, Мөрдөн байцаах албаны дарга, цагдаагийн хурандаа Б.Батсуурь болон банкуудын төлөөлөл, бусад албаны хүмүүс оролцов. Хэлэлцүүлгийн үеэр Ковид-19 цар тахлын нөлөөгөөр цахим орчин дахь хэрэглээ нэмэгдэхийн хэрээр олон улсад “залилах” гэмт хэргийн хохирлын хэмжээ өсөн нэмэгдэж буйг онцоллоо. Тухайлбал, Холбооны мөрдөх товчооны мэдээллээр цар тахлын улмаас дэлхий даяар цахим халдлага 300 хувиар өсөөд байгаа нь яах аргагүй анхаарал хандуулах асуудал болоод байгаа юм.

Мэдээлэл, технологийн хурдацтай хөгжил нь төлбөр тооцооны хэрэгсэлд амжилттай нэвтэрч, хэрэглэгчдийн цаг хугацааг хэмнэж, хэрэглээг улам бүр хялбарчилж буй сайн талтай ч, нөгөө талаар иргэдээс мэдээллийн аюулгүй, хянамгай байдлыг илүүтэй шаардах болов. Монгол Улсын хувьд, 2021 оны эхний 6 сарын байдлаар цагдаагийн байгууллагад бүртгэгдсэн нийт гэмт хэргийн 24.7 хувийг зөвхөн залилах гэмт хэрэг эзэлж байна. 2020 оны эцсийн байдлаар залилах гэмт хэргийн тохиолдлын тоо өмнөх оны мөн үетэй харьцуулахад  2.4 дахин буурсан хэдий ч хохирлын хэмжээ өссөөр байгаа юм.

Санхүүгийн зах зээлийн тогтвортой байдлыг хангах, иргэдийн эрх ашгийг хамгаалах, тэдний санхүүгийн болон хууль эрх зүйн мэдлэгийг дээшлүүлэх зорилгоор санхүүгийн залилангаас урьдчилан сэргийлэх 4 дэх удаагийн аяныг  Монголбанк, Мөрдөн байцаах алба, Монголын банкны холбоо хамтран хэрэгжүүлж байна. Энэ удаагийн аянаар цахим орчинд үйлдэгдэж буй залилах гэмт хэрэгтэй тэмцэх, үүнтэй холбоотойгоор иргэдийг мэдээллээр хангаж, анхааруулахад голлон чиглэж ажиллаж буйгаараа онцлог юм.