“ДЭЛХИЙН МӨНГӨНИЙ ДОЛОО ХОНОГ-2022” АЯН ЭХЭЛЛЭЭ

“Дэлхийн мөнгөний долоо хоног” аяны нээлтийг 03-р сарын 14-ний өдөр зохион байгууллаа. Олон улсын эдийн засгийн хамтын ажиллагаа, хөгжлийн байгууллагын Санхүүгийн боловсролын олон улсын сүлжээ (OECD/INFE)-нээс 2012 оноос хойш энэхүү аяныг хүүхэд, залуучуудын санхүүгийн боловсролыг дээшлүүлэх, олон нийтийн анхаарлыг хандуулах зорилготой дэлхий нийтээр тэмдэглэж буй. Энэ жил тус аяныг “Мөнгөө ухаалгаар удирдаж, ирээдүйгээ өөрөө бүтээе” уриатайгаар тэмдэглэж байгаа бөгөөд Монгол Улс 9 дэх жилдээ тэмдэглэж байна.

Тус аяныг Монголбанк, Санхүүгийн зохицуулах хороо, Гэр бүл, хүүхэд залуучуудын газар, БШУЯ-ны харьяа Насан туршийн боловсролын үндэсний төв, Нийслэлийн Жижиг, дунд үйлдвэр, үйлчилгээг дэмжих төв НӨҮГ, Монголын банкны холбоо, арилжааны банкууд, Хадгаламжийн даатгалын корпораци, ХБНГУ-ын Шпаркассэ банкны Монгол дахь сан, Зээлийн батлан даатлын сан, арилжааны банкууд, Рио Тинто ХХК, Юнител групп, Lemon Press компани,  Мобифинанс ББСБ хамтран өнөөдрөөс эхлэн 3 дугаар сарын 27-ны өдрийг дуустал орон даяар хэрэгжүүлнэ.

Аяны хүрээнд хувь хүний санхүүгийн төлөвлөлт, ирээдүй рүү чиглэсэн хуримтлал ба хөрөнгө оруулалт хийх, мөнгөө зөв удирдсанаар ирээдүйн сайн сайхныг бүтээн бий болгож, санхүүгийн эрх чөлөөнд хүрэх зэрэг агуулгын хүрээнд сургалт, уралдаан тэмцээн, нөлөөллийн арга хэмжээнүүд зохион байгуулна.